Summerbummel mit Corona
Ammene summerlige Samschdig-Nomidaag im Auguscht, dräffe sich 9
Altgardischte zum Apéro uff dr Pfalz. Es hett e huffe sälbergmachti
Snäggs und nadyrlig, wie bi däre Wärmi au Pflicht, gnueg Flüssigs gä.
Nach dämm fascht alles gläärt und uffgässe gsi isch, isch es zem
aigendlige Bummel ko. Mir sind die huffe Stääge abwärts zer
Minschterfähri gloffe und hänn dert uff d‘Fähri gwartet. Wo d’Fähri am
Stääg aagleggt hett, hett’s g’haisse Masgge aa und uff’s Schiffli go.
Guet Gluunt, do d’Kreativität bi de verschiedene Masgge wo zem
Vorschyn ko sinn, s’Ainte oder Andere verschteggte Schmunzle und Auge
uffblitze ussglösst hett, hänn mir ins Glaibasel yberegsetzt.
Dert aako, sind mir am Rhyufer entlang zer Dalbefähri gloffe und hänn
wieder ins Grossbasel yberegsetzt. Im Restaurant Papiermühli hett’s
wieder e Apéro gä, will‘s jo so haiss gsi isch und me jo dringge muess.
Während em Apéro hänn mir e Wettbewärb in d’Händ griegt und alli
hänn sofort dermit aagfange dä z’löse, d’Frooge sinn sehr spannend gsi
und wenn mir nimm wytter gwüsst hänn isch s’Händy züggt worde, e
herrliggs Bild, fascht alli am Disch mit eme Händy in dr Hand, wie
d’Schuelgoofe.
Nach dämm dr Wettbewärb an d’Organisatorinne zrugg gange isch und
die zwai dä au grad benotet hänn, isch wieder uffbroche worde, zem e
glaine Spaziergang in dr Dalbe z‘mache und sinn zer Aine vo de letschte
Stadtmure in dr Stadt gloffe. Es isch e tolle Aabligg gsi, do si no guet
erhalte isch.
Mit dr Dalbefähri sinn mir wieder ins Glaibasel zrugg und sind zem
Restaurant Ziegelhof spaziert, dert isst me jo sehr guet und eso hänn
mir e sehr, sehr tolle Daag mit vyl Lache, guete Gspröch, guetem Ässe
und Dringge derfe zämme verbringe. Trotz Corona.
Dr Lisa und dr Sonja möchte ych im Namme vo allne Dailnähmer rächt
härzlig fir dä tolli Summerbummel dangge, är isch vom Aafang bis zem
Änd super dure organisiert gsi.
Und übrigens, dr Gwinner vo däm Wettbewärb hett dä Bricht derfe
schrybe.
